Reagime – CEL

Emilia Rexhepi është zgjedhur Zëvëndëskryeministre e tretë për Çështje të Pakicave dhe të Drejtave të Njeriut.

E njëjta, në intervistën me Kallxo.com në vitin 2019, kur u pyet se nëse është për apo kundër martesave në mes të gjinisë së njëjtë, tha se është KUNDËR.

Fakti që një person që përfaqëson dhe thirret në të drejta të njeriut e që synim gjoja ka “respektimin e ligjit për punësimin e komuniteteve pakicë” dhe “avansimin e grave në të gjitha lëmitë shoqërore” dhe njëkohësisht diskriminon publikisht komunitete të tjera – LGBTI – është ironike dhe lë të nënkuptohet se i gjithë avokimi dhe lobimi për të drejta të njeriut nuk është i sinqertë.

Mospërfaqësimi i denjë i deritanishëm në nivel institucional ka bërë që të drejtat e njeriut, me theks të veçantë të drejtat e personave LGBTI+, të mos jenë asnjëherë prioritet i qeverisë sonë e që vazhdimisht të shkelen e të mos respektohen.

Në Kosovën me një shoqëri me shumicë homofobike e transfobike është i nevojshëm ndërgjegjësimi nga lart poshtë. Përderisa personat LGBTI+ nuk do të kenë përfaqësim të dinjitetshëm nga udhëheqësit e vendit, ata do të vazhdojnë të diskriminohen në baza ditore.

CEL Kosova I bën thirrje Emilia Rexhepit që të dal publikisht me një deklaratë dhe të tërheq qëndrimin e saj të mëparshëm pasi që tashmë përgjegjësitë e saj për përfaqësim të popullit Kosovar janë shtuar me automatizëm që kur është përzgjedhur Zëvëndëskryeministre e tretë për Çështje të Pakicave dhe të Drejtave të Njeriut.

Personat LGBTI+ janë qytetarë dhe taksapaguesë të Kosovës dhe duhen trajtuar në mënyrë të barabartë me qytetarët e tjerë dhe t’u respektohen të drejtat.

Republika e Kosovës ka një rrugë të gjatë përpara në drejtim të të drejtave të njeriut. Meqë të drejtat e personave LGBTI+ janë pjesë përbërëse e pakos së të drejtave të njeriut, duhet bërë punë e konsiderueshme për të arritur një nivel të kënaqshëm të zbatimit të plotë dhe avancimit të mëtejmë të të drejtave të këtyre personave.

Puna dhe përfaqësimi i denjë për personat LGBTI+ do të jenë sfiduese për mandatin e ardhshëm të Kuvendit të Republikës së Kosovës meqënëse në përbërje të tij janë një numër i madh i deputetëve të cilët janë deklaruar haptazi se janë kundër apo neutral ndaj çështjes së të drejtave LGBTI+.

Është mëse shqetësuese fakti që personat që përfaqësojnë popullatën e Kosovës e të cilët zotohen të punojnë në të mirën e popullit kanë besime personale dhe mendësi homofobike e transfobike dhe që përjashtojnë dhe privojnë një komunitet të plotë nga të drejtat e tyre.

Mosangazhimi i qeverive të kaluara në këtë drejtim ka rezultuar në një pozitë shumë të pafavorshme e të cënueshme që personat LGBTI+ sot gëzojnë. Rastet e krimit dhe gjuhës së urrejtjes janë duke u shtuar gjithmonë e më shumë, veçanërisht gjatë periudhës së pandemisë ku kanë shënuar një rritje si asnjëherë më parë.

Masa urgjente janë duke u ndërmarrë për një mori personash LGBTI+ nga CEL Kosova, integriteti fizik e psikologjik i të cilëve është duke u cënuar nga vetë familjarët e tyre deri tek kalimtarët e rastit nëpër rrugë.

Marrë për bazë këtë situatë të përkeqësuar, qeveria e ardhshme duhet me deomos të ndërmarrë hapa konkret dhe të jetë më gjithëpërfshirëse pasi që personat LGBTI+ pothuajse se çdo herë mbesin jashtë planeve, programeve dhe politikave në nivel institucional. Personat LGBTI+ kanë nevojë për funksionim më të mirë dhe të besueshëm të institucioneve të rendit me qëllim që rastet e dhunës dhe torturës të parandalohen.

CEL Kosova u bënë thirrje udhëheqësve të ardhshëm të Parlamentit të Kosovës që t’i prioritizojnë problemet dhe sfidat e personave LGBTI+, mirëqenien fizike dhe psikologjike të tyre.

Po ashtu, u bëhet thirrje udhëheqësve të ardhshëm që të punojnë drejt ndërgjegjësimit brenda parlamentit për të votuar në favor të martesave në mes të gjinisë së njëjtë në Projekt Kodin Civil, e drejtë kjo që tashmë ofrohet nga Kushtetuta e Kosovës por që bie ndesh dhe ka mbivendosje me ligjet e tjera të Republikës së Kosovës.

Kosova duhet ndjekur shembullin e Parlamentit Evropian i cili së fundmi ka shpallur Bashkimin Evropian zonë të lirisë për personat LGBTI+ pasi që një ndër kërkesat për integrim në Bashkim Evropian është respektimi i të drejtave të njeriut.

Kategori: Reagime

Reagim ndaj Emilia Rexhepi

Reagim ndaj deputetëve kundër të drejtave LGBTI+